| 1 |
 |
“...gradisi nos masha.
Pero nos viktoria tabata anochi. Banda di shetor nos a pasa serka e nigritanan. Tabatin un fiesta di grita. Nos dos a hala na pia, bai Rio Canario banda di nuebor, morto kans, pia tembla-tembla. Pero satisfecho ku nos a solushna e kaso den tur su detajenan.
*
* *
Un otro amigu polis, ku mi a kore patruja ku ne, tabata mas floho ku kaka di marduga. Mi no por korda su nomber mas. E tabata kor di bebe rom. Esei tabatin un kapasidad original. Sint riba bisikleta, e por a pusha un pedal djis un tiki, i sigui kore kasi shen meter, sin manda bisikleta. Ta e toro ei a sinjami kon bo por drumi, sint riba bisikleta. Por siertu un posishon masha doloroso. Pero ta posibel.
Kwa patruja ku ma sali huntu ku floho, e mester a buska mesora un luga den fresku, pa e para huma su sigaria. Si mi konose tur mondi den Suffisant, ta pasobra floho a sinjami.
*
* *
Un dia mainta, banda di mitar di ocho, e amigu di mi (esun di den Valentijn) i ami tabata koriendo banda di otro riba kaminda grandi...”
|
|
