| 1 |
 |
“...Un hende ku no ta polis lo por a guli e reportahe ei. Pero nos no. Pasobra ta imposibel pa bo klop sali kai for di e saku smalitu largu na bo karson di uniform.
*
* *
Ta kiko lo por a buta tur hende bira asina indiferente den e anjanan di gera? Ta kwa'ta e motibu, ku a buta, ku nos no tabata kibra kabes ku nada mas?
Shapnan tabata jen di hende. Tabatin bon ganashi. Hopi hende a gana plaka ku fasilidad, pero gaste mes lihe atrobe. Bagamunderia i relaho tabata reina.
Mi ta kere ku ta e idea, ku kada dia tabata un. Ku kisas su manise tur kos lo por a kaba. Por siertu, gera tabata rondona nos. Submarinunan Aleman tabata pasa rondo di Corsou. E bapor Erie a bula banda di Piscadera. Nan a torpeda varios bapor djis serka di nos. Inglesnan a bini, ku nan quick-step. Despwes Amerikanunan, Portorikenjonan, Colombianunan. Miles di nabegante desespera tabata konsidera Corsou un oasis, kaminda nan por a kwe un rosea, pa bolbe sigui nabega den e peliger konstante.
Ta tur e kosnan aki lo a influensha...”
|
|
| 2 |
 |
“...Chris a hiba e karta. I Chris a keda wak e luitenant duru den su kara. E luitenant a komprond ku e kos ei si a pasa meta. Sin papia un palabra el a sker e karta, tire den kaha di sushi, dilanti di Chris.
*
* *
Inkreibel ta e motibu pakiko nan a barka un polis, manda Corsou.
E homber aki tabata par na post, kontra di laman, den nos kampamentu. Sigun su consigna, skirbi riba un pida karton, kologa den e kasita di e post, el a obra. Un Aleman a landa bai muchu afo, ora nan tabatin okashon di landa. Teniendo kwenta ku su consigna, e polis a grita e Aleman ku e mester bolbe mas paden. Esaki el a hasi dos be. Sinembargo e Aleman a hari i sigui landa bai mas pafo.
E segundo paso pa e polis (sigun su consigna), tabata di los un bala den direkshon di e Aleman. Morto spant e Aleman a landa bini tera mesora. Pero e polis mester a barka bai Corsou mesora. E tabata ongeschikt pa Boneiru ...
*
* *
Pero senjora di un hefe haltu, kende tambe tabatin sintimentu pro-Nazi, NO tabata den kampamentu.
Tabatin...”
|
|
