| 1 |
 |
“...Nos a hanja pki ku skop i krenwa. Hermano, un siman largu nos a tira pki, koba grijs, jena krenwa, bai basha den e formanan di tabla ku nan a traha na e kwater skinanan di kampamentu. Lomba sunu nos a traha. Soda manera buriku. Anochi nos lomba tabata saka vlandam di dolo. Pero su manise mester a sigui hupa.
Porfin nos a logra jena tur kwater mitrailleursnest ku grijs.
Awor ta bini e grasia ... Durante di henter gera ni un di e kwater puestonan ei no a mira ni sombra di metrajadora.
Nos a uza un di nan. Un so. Esun den e huki parti pariba. Komo e tabatin mas o menos un meter i mein di haltura, e tabata net e kos pa drumi skondi, ora nos tin kampwacht. Anto un ta keda lant pa wak ora sergeant ta bin kontrola. Ku un monton di e mes piedanan di grijs ku a habraka nos kurpa, nos tabata tira riba esun drumi, pa nos tur dos por a meldu: Geen bijzonderheden.
*
* *
Despwes di masha tiki tempu nos ku ta nobo a forma amistad ku esnan mas biew. I e komprenshon a bin bira asina bon, ku nos tabata forma...”
|
|
| 2 |
 |
“...Bo ke kere ku despwes nos a forma un amistad masha sinsero ku e
makamba?
*
* *
Awor mi ta bini pa esun pia di kater, ku bigoti spinja. E homber ei tabata un tipo singular. E tabata makamba. Pero su hulandes tabata loke se jama mankaron. Riba un dia el a tira un buriku mata. Bo mester sa ku
polisnan tabata kwe e burikunan ku ta kamna riba kaja. I si donjo no bin
buska nan, anto ta tira e bestianan mata. Pia di kater tabata gosa ki ora ku e por tira un buriku mata.
Ku masha delikadesa e tabata marka dos linja ku potlot riba e buriku su kabes: Di orea drechi pa wowo robes. Di orea robes pa wowo drechi. Dos linja krus. Anto net kaminda e linjanan ta krusa, e ta buta su pistol, laga bala bai. No tin nada mas tragiko ku mira un buriku muri di tal manera. Di ripjente su pianan ta perde forsa. E ta sak den otro, keda morto, sin bisa ni hi.
Ta klaro ku Pia di kater mester nota e kos ei den wachtrapport. Pesei un dia el a skirbi: Heden een ezel doodgeschoten, benevens de kampcommandant.
*
* *
Te...”
|
|
| 3 |
 |
“...Asina e porkonan tabata patras den pick-up, nan a bolbe tumba pa Plaja. Ma .. mester a bolbe bishita kada shap. Kon nan a jega bibu tabata un misterio.
Kestion ku tin, mas o menos enfrente di e santana katoliko riba Wilhelminaweg, nan a dal un buriku. E buriku a pega den e bumper di e pick-up, sin por los. Mientrastantu porkonan tabata grita patras den baki di e pick-up. Godverdomme a jobe. Ku nan kabes zorokloko di rom, nan a baha i purba saka e buriku. Nan no a logra. I di tal manera nan mester a pasa den kajanan di Plaja, te Forti. Ei otro polis a tira e buriku mata. Ku pata di kabra mester a ranka e buriku for di e bumper.
Durante di patruja ku barku di bela tambe rom tabatin e papel prinsipal. Mi di: Patruja ku barku di bela. I ta berdad mi ta papia. Un majoor di nos a inventa e idea fantastiko, ku nos mester bai hasi patruja ku un barku di bela, pa wak ... submarinu!
Dos polis, ku nan karabijn, i dos Bonerianu tabata subi barku tardisitu, pa bai liga asuntu di e submarinunan Aleman...”
|
|
