| 1 |
 |
“...mi ta korda kla. Nochi tabata bunita. Tur na strea. No tabatin ni un punti nubia.
E bentana parti pariba tabata habri, di moda ku mi por a mira e faro ku tabata drei i tira su lus riba tera i riba laman.
Sigun mi tabata drumi pechu ariba, pensando riba mi kas ku mi junan na Corsou, ma tende un muhe ta jora. Pero jora masha tristu. E kos ei a stranjami masha, pasobra nunka mi no a mira un muhe ei riba. Prome ma kere ku ta spiritu. Pero e joramentu tabata zona muchu duru. Spiritu su jor ta mas lastimoso.
Ma lanta poko-poko for di swela, kohe mi chapara i sali bai pafo. Tabatin un bientu friw ta korta. Ma laman tabata kalmu. Riba e pidasitu plaja ma mira e muhe par. E tabata delega, blo sunu. Ku su man na laria e tabata grita jora. Bientu tabata pone su kabei largu bula.
Ma grite: Mira, ta kiko a pasa ?
Di ripjente el a stop di jora i bira wak mi. Mi no por a mira su kara na e distansha ku mi tabata, pero e manera ku el a dal su mannan, tapa su pechu, a butami kompronde ku el a spanta.
Ma bolbe...”
|
|
| 2 |
 |
“...poko-poko. I Henri a kompronde mesora ku Amelia ta ei den.
Henri a dal un gritu: Habri lihe, sino mi ta kibra e porta aki.
Mi ta bini, shon Henri. Mi ta bini, e tanta a kontest. Ta un shimis mi ta tira na mi kurpa. Djis despwes e porta a habri na un skref. Den e tiki klaridad di un lampi di korozin riba mesa den huki, Henri a mira un muhe gordo par. Mesora el a pusha e porta habri i drenta kas.
Unda Amelia ta? Ma tende kon e ta jora?
Ai, e pober su kurpa ta malu, e tanta a kuminsa papia ku stem lastimoso. E ta na kama. Awor ei el a pega sonjo.
Laga di ta ganja koi loko. Amelia! Henri a pusha e tanta un banda, dal e porta di kamber habri. Amelia, drumi riba kama, a tapa su kara ku laker i kuminsa jora amargamente.
Bon sar Henri a jega na e kama, i bisa Amelia ku e mester ban kas mesora.
Mi no por, Henri, Amelia a jora. Mi no por. Bai lagami.
Pakiko bo no por? Ta kiko a pasa? Bo kabes ta parew?
Mi no por kontabo, mi amor. Bai, bai lagami. No buskami nunka mas.
Mientrastantu e tanta a keda para...”
|
|
