| 1 |
 |
“...Aki banda ta jen di tribon, ma grita mas dura ku mi por. Pero a muhe a sigui landa bai afo, te ku el a disparse den skuridad.
Su manise mi amigunan a harimi, ora ma konta nan di e muhe sunu ku kabei largu. Feli di ku ta spiritu o kwalke alma malu. Pero ami tin sigur ku ta un muhe bibu. Sigun mi por a mire den lus di e faro, e tabatin un kol hopi kla. Kasi sigur tribon a kome. Rei ku ei banda ta jen...........
Pero bo sa, ora mi ta sinta drecha mi trai aki bow, semper mi tin ku pensa riba e muhe ei. Ma hanja su saja tira riba plaja. Un saja blanku di nanso. Mi tin e ward te ainda den mi bal den mi kamber.
Pakiko bo no a avisa polis despwes? ma puntra Pol. Ata bo tin e saja?
Pol a hala un rosea grandi, bati e shinishi for di su pipa riba pida pieda i bira wak su boto den awa.
Mi tabatin miedu, el a sigui. Pasobra ma sinti ku mester tin mas kos ei tras. I mi ke ku ma hasi bon di no papia. Pasobra hopi tem despwes Feli ta kontami, e mesun Feli ku tabata huntu ku mi riba Klein Corsou, owel Feli...”
|
|
| 2 |
 |
“...bentana. Henri a bula subi e dos tret di stupi dilanti di e kas i bati duru na porta.
Ta ken? un hende a kontest paden.
Henri. Unda Amelia ta?
A keda un silensio den kas. Henri a pone su orea na porta pa e skucha bon. A parse ku el a tende un hende jora, mientras un otro a papia algu masha poko-poko. I Henri a kompronde mesora ku Amelia ta ei den.
Henri a dal un gritu: Habri lihe, sino mi ta kibra e porta aki.
Mi ta bini, shon Henri. Mi ta bini, e tanta a kontest. Ta un shimis mi ta tira na mi kurpa. Djis despwes e porta a habri na un skref. Den e tiki klaridad di un lampi di korozin riba mesa den huki, Henri a mira un muhe gordo par. Mesora el a pusha e porta habri i drenta kas.
Unda Amelia ta? Ma tende kon e ta jora?
Ai, e pober su kurpa ta malu, e tanta a kuminsa papia ku stem lastimoso. E ta na kama. Awor ei el a pega sonjo.
Laga di ta ganja koi loko. Amelia! Henri a pusha e tanta un banda, dal e porta di kamber habri. Amelia, drumi riba kama, a tapa su kara ku laker i kuminsa jora ...”
|
|
