| 1 |
 |
“...di dje. Nigun hende. Danki, Rudelof, Bon Pasku. Nos bon Dios ta kompronde tur kos.
Hendenan a kuminsa sali for di misa. Apenas nan tabata pafo, ku nan a kuminsa papia, borota i hari. Tur tabata desea otro Bon Pasku, brasa otro, duna man.
Petra ku Rodolfa a kamna boka ketu, bai kas. Hendenan a keda mira nan, pero sin riska bisa algu. Ta kon bo por desea dos hende Bon Pasku, ora dos famia di nan a kaba di muri ?
Un poko pariba di misa tres homber tabata para kombersa na bos haltu. Mester ta ku bispu di Pasku nan a kore un paranda sep, i drumi unda ku ta. Nan panja i nan kabei tabata jen di tera.
Despensami, Petra, esun di mas biew a kuminsa, ora mama ku ju a pasa banda di nan. ,,Bo por bendemi un pinchi di rom?
Petra a drei mire ku despresio. Awe mi no ta bende rom.
Ba mira? e homber a bira bisa su amigunan. Tasina ta mundu. I despwes di esei el a dirig palabra na Petra: Ma no lubida ku tami mes ta Aloisio. Ba lubida kon nos a frei bow di palu di tamarein, patras den kur di bo mama? Bon Pasku...”
|
|
